HÅVARD DALSBØ
Søndag er gudstenestedagen i Filadelfia. Dette er dagen i veka vi samlast for å dele fellesskap med Gud og fellesskap med kvarandre, og søndag 22. september kl. 11 får mange av oss stifte nytt bekjentskap. Vi får nemleg besøk av Håvard Dalsbø - ein ung herremann frå Volda. Til dagleg arbeider han som teknikar for Låssenteret AS, men han er også låtskrivar, vokalist og gitarist, og om du tek eit søk på Spotify, Facebook eller Instagram - så vil du finne mannen med gitaren og den unike røysta som produserer musikk i rekordfart! Her snakkar vi country & blues.
Lovsong må få ein god plass når vi kristne kjem i saman. - Vi tar ikkje mål av oss til å gi einkvar sin favorittmusikk, til det er musikksmak for individuelt og kan lettare møtast på musikkanlegget heime. Songen og musikkens hensikt i gudstenesta er å berøre hjarta våre, og framfor alt å ære Gud. Lovsong er eit naturleg uttrykk for vår relasjon til Gud, og ei hjelp til å kome i kontakt med Han på ein sterkare måte. Vi ønsker å erfare Hans nærvær kvar gong vi møtast til gudsteneste, og denne søndagen er det Team Oddgeir som leier oss i lovsongen, og vi håpar sjølvsagt vi får høyre noko av Dalsbø også.
Det vert også høve til nattverd.
Vi håpar du lar deg inspirere til å ta turen til Filadelfia søndag. Vi har tru for at Dalsbø har noko å formidle til deg - både i ord og tonar. Og hugs - uansett kven du er, kor du kjem frå, eller korleis veka di har vore, så er du alltid hjartevarmt velkomen. Møtevertar har kaffien klar om du poppar innom.
